Хәажәкыра 24 азы Аԥснытәи аҳәынҭқарратә университет жәларбжьаратәи аимадарақәеи аекономикатә зҵаарақәеи рыпроректор Даур Ақаҩбеи аҿар рполитиказы апроректор Иури Трувалиови рхы аладырхәит Урыстәыла апроректорцәа иреиҳау арҵаратә хеидкыла аусура. Ари ахеидкыла аҭакԥхықәра рыдуп аҿар рааӡареи, аҿартә политика анагӡареи ирыҵаркуа азҵаарақәа жәпакы. Урыстәылатәи Афедерациа аҿар рполитика ахеидкыла хантәаҩра азиуеит Григори Гуров.

Амшхәаԥштә аҟны иқәгылаз азҵаарақәа иреиуан аҿар рыбжьара агеополитика иазку алекциақәеи еиуеиԥшым аусмҩаԥгатәқәеи рымҩаԥгара .

«Аилацәажәара ҟазшьас иаман адунеи аҟны иахьа имҩаԥысуа агеополитикатә хҭысқәа аҿар реилыркаареи уи аганахьала рымҩақәҵареи», - ҳәа азгәеиҭеит Трувалиов.