Мшаԥымза 5 азы иазгәарҭо "Ашәҟәқәа ҳамҭас рыҭара амш" инамаданы, Аԥсны иҟоу Россотрудничество ахаҭарнакреи А.Солженицын ихьӡ зху аҳәаанырцә иҟоу аурыс музеи ахаҭарнакцәеи Аԥснытәи аҳәынҭқарратә университет абиблиотека ҳамҭас иарҭеит 307 цыра ашәҟәқәеи ажурналқәеи.

Асасцәа идикылеит ААУ аекономикатә зҵаарақәеи, жәларбжьаратәи аимадарақәеи рыпроректор Даур Ақаҩба. Уи иазгәеҭеит   астудентцәеи, абжьаратә школқәа рҵаҩцәеи, аҭҵаара знапы алаку аҿари рзы ашәҟәы еиҳау ҳамҭа шыҟам. Апроректор дрыхцәажәеит аусеицура аҳәаақәа ирҭакӡаны иазԥхьагәаҭоу апроектқәа.

Анаҩс, Аԥсны иҟоу Россотрудничество ахаҭарнакцәеи А.Солженицын ихьӡ зху аҳәаанырцә иҟоу аурыс музеи ахаҭарнакцәеи ААУ астудентцәа рзы ҳамҭас иааргаз рышәҟәқәа ӡырыргеит. Уи аҟны А.С. Пушкин иԥсҭазаареи ирҿиареи иазкыз алекциа даԥхьеит афилологиатә ҭҵаарадыррақәа рдоктор Ельмира Афанасиева.

Аусмҩаԥгатә рхы аладырхәит Россотрудничество ахаҭарнакра анапхгаҩы инапынҵақәа назыгӡо Михаил Масаев, Аԥсныи Урыстәылеи рыбжьара аамҭала агәрага инапынҵақәа назыгӡо Мақсим Литвинов, Аԥсны иҟоу Россотрудничество ахаҭарнакра апресс-маӡаныҟәгаҩ Денис Лавриков, Аԥсны иҟоу Аурыс культуратә центр анапхгарҭа ахантәаҩы Наталиа Каиун, А.Солженицын ихьӡ зху аҳәаанырцә иҟоу аурыс музеи иатәу жәларбжьаратәи аусеицура аҟәша аиҳабы Елена Кривова, И.Г.Папасқьыр ихьӡ зху абиблиотека аиҳабы Борис Ҷолариа, ААУ астудентцәеи, афилологиатә факультет арҵаҩцәеи.