Аԥснытәи аҳәынҭқарратә университет аҟны имҩаԥысит жәларбжьаратәи аҭҵаарадырра-практикатә конференциа.
ААУ аректор, академик Алеко Гәарамиа аконференциа аартуа, еизаз зегьы ирыдиныҳәалеит асимволтә ҵакы змоу ААУ 90 шықәса ахыҵра иазку аусмҩаԥгатә. Аректор еиҭеиҳәеит, ауниверситет ахыҵхырҭеи, ашьақәгылареи, жәларбжьаратәи аимадарақәеи ртәы, дазааҭгылеит ҳҵараиурҭа еснагь Аԥсны еиуеиԥшым аусбарҭақәеи аминистррақәеи дареи еиуеиԥшым ахырхарҭақәа рыла аспециалистцәа шазыҟарҵо.  
 ААУ аректор Алеко Гәарамиа иажәа хыркәшо иазгәеиҭеит:  "Иахьатәи зымҽхак ҭбаау, жәларбжьаратәи аҵарауаа злоу аконференциа атуризм аҿиара аҟны ҵәатәы шьаҟаны иазыҟалоит", - ҳәа.
Аусмҩаԥгатә рхы аладырхәит ААУ жәларбжьаратәи аимадарақәеи аекономикатә зҵаарақәеи рыпроректор, Аԥсны акультура аминистр Даур Ақаҩба, Аԥсны Аҳәынҭқарра  атуризм аминистр Ҭеимураз Хышба, ААУ аректор ицхырааҩ Анжела Қаџьаиа, ААУ аекономикатә факультет адекан Ева Озган, Аԥсны Ахәаахәҭра-Ааглыхратә Палата апрезидент Ҭамила Мерцхәлаа, ААУ апрофессор-рҵаҩратә еилазаареи астудентцәеи.
"Атурист-еиҭашьақәргыларатә комплекс  аилазаара арегионалтә ҿиара" ҳәа хыс измаз  аконференциа  еицеиҿыркааит: Аԥснытәи аҳәынҭқарратә университет, Ҟәбантәи аҳәынҭқарратә  университет, Сербиа иҟоу аурыс центр агеографиатә хеилак, Урыстәылатәи аекологиатә академиа, Аԥсны  агеографиатә хеилак, Жәларбжьаратәи  агеографиатә факультет аушьҭымҭацәа, Краснодартәи афедералтә университет, Краснодартәи акурорти атуризми рминистрра, Аԥсны Аҳәынҭқарра аминистрра, Аԥсны Ахәаахәҭра-Ааглыхратә Палата.
Аконференциа аҽалархәразы 50-ҩык инареиҳаны  аҵарауаа  ААУ иаҭааит. Еиуеиԥшым аҭагылазаашьақәа ирыхҟьаны, изымааз аҵарауаа  онлаинла ражәахәқәа ирыԥхьеит.
Аконференциа апленартә еилатәара аҟны 6-ҩык аҵарауаа ажәахәқәа ҟарҵеит.
Анаҩс, аконференциа аусура иацнаҵеит асекциақәа 2 русурала: атурист-еиҭашьақәыргыларатә комплекс арегионалтә ҭҵаара; аеконимика-напхгаратә аспект  атурист-еиҭашьақәыргыларатә ҿиара акомплекс. 
Атурист-еиҭашьақәыргыларатә комплекс арегионалтә ҭҵаара асекциа напхгара арҭон агеографиатә ҭҵаарадыррақәа ркандидат,   абиолого-географиатә факультет "агеографиа" акафедра анапхгаҩы Лана Ҟаитамба, агеографиатә ҭҵаарадыррақәа ркандидат Наталиа Комаревцева; аеконимика-напхгаратә аспект  атурист-еиҭашьақәыргыларатә  секциа напхгара арҭон  аекономикатә ҭҵаарадыррақәа ркандидат  Кристина Лакербаиа, агеографиатә ҭҵаарадыррақәа ркандидат Дмитри Мақсимов.
Аконференциа иамҽханакуаз азҵаарақәа иреиуоуп атурист-рекреациатә ҿиара азҵаара, атуристтә ҳәынҭқаррақәеи арегионқәеи рыҿиара, атурист-економикатә  напхгареи аекскурсиа аиҿкаареи амҩаԥгареи аан иҿыцу аметодқәа ралагалареи ртәы уҳәа жәпакы.