Мшаԥымза 19 азы Аԥснытәи аҳәынҭқарратә университет аҟны имҩаԥысит жәларбжьаратәи ажурналистцәа Реидгыла апрезидент ихаҭыԥуаҩ Тимур Шафир  иԥылара.

Аусмҩаԥгатә еиҿыркааит Аԥсны ажурналистцәа Реидгылеи жәларбжьаратәи амедиаклуб "Формат А3".

Ажурналисти астудентцәеи еиԥылаанӡа, асас дидикылеит ААУ аректор, академик Алеко Гәарамиа. Уи иазгәеиҭеит, асеиԥш иҟоу аиԥыларақәа аусуратә ҟазшьа шрымоу, насгьы апроект аҳәаақәа ирҭакӡаны ААУ аҟны алекциа иаԥхьо аҵарауаа рзыӡырҩрра ҳастудентцәа рзы ишыхшыҩрҵагоу.  Академик Алеко Гәарамиа еиҭеиҳәеит ауниверситет аҭоурых аҟнытә ихадоу апериодқәа, убри аан иазгәеиҭеит аамҭа уадаҩқәа иргәылиааиз ҳҵараиурҭа сынтәа 90-шықәса шахыҵуа.

Аиԥылара рхы аладырхәит ААУ аректор иабжьгаҩ, ажурналистика акафедра аиҳабы Гәырам Амқәаб, аҭҵаарадырра апроректор, афилологиатә ҭҵаарадыррақәа рдоктор Џьулетта Адлеиба, ателеканал "Абаза-ТВ" аиҳабы Руслан Ҳашыг, аректор ицхырааҩ Анжела  Қаџьаиа.

Аиԥылара аофициалтә хәҭа ахыркәшамҭаз ажурналист Тимур Шафир Аԥснытәи аҳәынҭқарратә университет ахьӡала  агәаларшәагатә ҳамҭақәа ианашьан.

Анаҩс, ажурналист Тимур Шафир астудентцәеи, Аԥсны аинформациатә хархәагақәа русзуҩцәеи рзы имҩаԥигеит "Ииашам ажәабжьқәа аинформациатә еибашьра аҟны рхархәареи рҿагылареи" ҳәа хыс измаз алекциа.

Аексперт еиҭеиҳәеит аинформациа аус адулараан ажурналист иуалԥшьеи ипрофессионалтә ҭакԥхықәреи ртәы, насгьы, ииашами ииашоуи аниформациа реилкаара атәы, иара убас, иахьатәи аамҭазы ажурналистика аҿаԥхьа идҵаны иқәгылақәоу азҵаарақәа  жәпакы.

Аиԥылара ахыркәшамҭазы ААУ арҵаҩцәеи астудентцәеи ажурналист иҭабуп ҳәа иарҳәеит аинтерес зҵаз алекциа азы.