Аԥснытәи аҳәынҭқарратә университет аҟны имҩаԥысит Аԥсны Аҳәынҭқарраҟны аԥсуа бызшәеи алитературеи дзырҵо, насгьы иаԥсуам ашколқәа рҟны аԥсуа бызшәеи алитературеи дзырҵо абжьаратә школқәа рырҵаҩцәа рԥышәеизырҳара зырҵабыргуа аршаҳаҭгақәа рыҭара.

Иазгәаҭатәуп, аԥышәеизырҳаразы акурсқәа шеиҿкааз Аԥснытәи аҳәынҭқарратә университет аҟны иаԥҵоу аквалификациа аизырҳареи аспециалистцәа реиҭазыҟаҵареи ирызку Ареспубликатә центри Аԥсны Аҵареи абызшәатә политикеи рминистрреи раԥшьгарала.

Аусмҩаԥгатә рхы аладырхәит ААУ аҟны иаԥҵоу аквалификациа аизырҳареи аспециалистцәа реиҭазыҟаҵареи ирызку Ареспубликатә центр анапхгаҩы Медеиа Ченгьелиа, ААУ апедагогикеи аметодикеи ркафедра аиҳабы Алеқсеи Касланӡиа, ақ. Аҟәа, Гагра, Аҟәатәи араионқәа, алицеи-интернатқәа, насгьы иаԥсуам ашколқәа рҟынтәи арҵаҩцәеи, аметодистцәеи.

Аԥышәеизырҳара ацентр аиҳабы Медеиа Ченгьелиа ҷыдала иҭабуп ҳәа ралҳәеит аҵараиурҭа арҵаҩцәа, лымкаала ААУ аректор, академик Алеко Гәарамиа акурсқәа реиҿкаара аус аҟны иҟаиҵаз адгылареи ахылаԥшреи рзы.

Анаҩс, еизаз идырбан агазеҭ «Аԥсуа университет» аредактор хада Алхас Чхамалиа иазирхиаз аквалификациа аизырҳареи аспециалистцәа реиҭазыҟаҵареи ирызку Ареспубликатә центр реихшьаалатә усура иазку авидеоролик.

Аусмҩаԥгатә ахыркәшамҭазы аԥышәеизырҳаразы акурсқәа ирхысыз арҵаҩцәа зегьы аршаҳаҭгақәа рыҭан.