Аԥснытәи аҳәынҭқарратә университет аҟны имҩаԥысит зыхьӡ нагоу актиор, арежиссиор, Иарославтәи  адраматә театр асахьаркыратә напхгаҩы, Урыстәыла зҽаԥсазтәыз артист Сергеи Пускепалис иԥылара.

Аусмҩаԥгатә еиҿыркааит Аԥсны ажурналистцәа Реидгылеи жәларбжьаратәи амедиаклуб "Формат А3". Иазгәаҭатәуп, урҭ изныкымкәа Аԥсныҟа ишаарыԥхьахьоу зыхьӡ нагоу аполитикцәеи, ажурналистцәеи, ауаажәларратә усзуҩцәеи.

Сергеи Пускепалиси астудентцәеи еиԥылаанӡа, ААУ аректор, академик Алеко Гәарамиа дидикылеит. Аректор иазгәеиҭеит ҳаԥсадгьыли ҳҵараиурҭеи аамҭа уадаҩқәа шырхыргахьоугьы, аҿиара амҩа иқәуп ҳәа. Алеко Гәарамиа иҳәеит иара изын ишгәахәа дуу апроект имҩаԥнаго хықәкылатәи аусмҩаԥгатәқәа. Иазгәеиҭеит, Пускепалис иеиԥш иҟоу аҟазареи алитературеи рҟны аџьабаа ду збахьоу ҳҵараиурҭа аҭаара крызҵазкуа хҭысны дшахәаԥшуа.

Арежиссиор Сергеи Пускепалис иҭабуп ҳәа ахиҳәааит Алеко Гәарамиа ихшыҩрҵагоу иажәақәа рзы: "Изызҳауа аҿар ирдыруазароуп Аԥснытәи аҳәынҭқарратә университет аҟнытә ауп аԥсҭазаарахь амҩа анылара шақәнагоу", - ҳәа.

РУСДРАМ адиректор хада Иракли Хынҭәба иазгәеиҭеит, Алеко Алықьса-иԥа Гәарамиа ҳаамҭазтәи ауниверситет шаԥиҵаз: "Аҵарадырраҟны аԥсуаа иҳамаз еиқәырхауа еихашәҳаит аԥсуа культура, ишәааӡеит аинтеллектуалтә ҿар. Ҳара ҳаҭыр дуу ҳзақәуп шәара адунеиаҟны ахыԥша ду ишәымоу, уи ҳара ҳзы игәадуроуп".

Аиԥылара ахыркәшамҭазы ААУ ахьӡала асасцәа ирыҭан агәаларшәагатә ҳамҭақәа.

Аусмҩаԥгатә рхы аладырхәит: Аԥсны акультура аминистр Даур Ақаҩба, ААУ аректор иабжьгаҩы, ажурналистика акафедра аиҳабы, апрофессор Гәырам Амқәаб, афилол.ҭҵ. рдоктор, апроф. ААУ аҭҵаарадырра аҟәша апроректор Џьулетта Адлеиба, афилософиа акафедра аиҳабы, философ.ҭҵ. рдоктор, апрофессор Иван Ҭарба, ААУ аҟазарақәа рыҟәша анапхгаҩы Нугзар Логәуа, ателеканал «Абаза-ТВ» адиерктор хада Руслан Ҳашыг, РУСДРАМ адиректор хада Иракли Хынҭәба, ААУ аректор ицхырааҩы Анжела Қаџьаиа.

Анаҩс, актиор Сергеи Пускепалис ААУ астудентцәа рзы "Аҟазара знапы алаку ауаа аамҭа аиҭасымҭазы" ҳәа хыс измаз алекциа даԥхьеит. Урыстәыла акино иазҿлымҳау ауаа зегьы бзиа иеицырбо актиор Сергеи Витауто Пускепалис иазгәеиҭеит ауаҩы изы 40 шықәса азы шаку акино аҟны аԥсҭазаара ианалаго. Иазгәаҭатәуп, актиор 40 шықәса анихыҵуаз ауп раԥхьаӡа актиор изанааҭ даназааи.

Аусмаԥгатә аҳәаақәа ирҭакӡаны ААУ астудентцәа актиор азҵаарақәа ирҭон.

Актиори астудентцәеи реиԥылара рхы аладырхәит ААУ апрофессор-рҵаҩратә еилазаара, астудентцәа, Аԥсны амасса-информациатә хархәагақәа русзуҩцәа.