Азҵаара рыҭара



АДНЫҲӘАЛАРА

Аԥснытәи аҳәынҭқарратә университет аректорати апрофессор-рҵаҩратә еилазаареи лымшира лыдырныҳәалоит аҭҵаарадырраус апроректор, Алингивистикеи​ аинформациатә технологиақәеи р-Центр анапхгаҩы, абызшәадырҩы, алитератураҭҵааҩ, афилологиатә ҭҵаарадыррақәа рдоктор, АМАН академик, апрофессор Џьулетта Адлеиба.

​Ҳаҭыр зқәу Џьулетта Ианкәа-иԥҳа!​

Ҳколлектив зегьы рыхьӡала гәык-ҧсыкала шәиирамш шәыдаҳныҳәалоит!

Ҳазшаз имҭаны Шәара шәхаҭараҿы еизыркәкәоуп еиуеиԥшым абаҩхатәрақәа:​ аԥышәа ду змоу аҵарауаҩ, аҭҵаарадырра аус аиҿкааҩ, атеориатә дыррақәа апрактикаҿы ишьақәзырӷәӷәо арҿиаҩы.​ Шәзанааҭтә ҩаӡара  инаваргыланы Шәара ишәымоуп иҷыдоу аҟазшьа -  ауаҩы имаршәа кны изнеишьа.

Ш​әнапы злаку аус алҵшәақәа ирыбзоураны ҵарауаҩк лаҳасабала Шәара шәеицырдыруеит ҳтәыла аҟны еиԥш, уи анҭыҵгьы. Агәра ганы ҳаҟоуп Шәара шәдырреи, шәҧышәеи, шәбаҩхатәреи зегьы ааидкыланы аҧхьаҟагьы ҳмилаҭтә ҵараиурҭа арҿиареи ҳаҭҵаарадырра аус ашьҭыхреи рҟны ҵәатәы шьаҟаны ишыҟало ала.

Ари амш лаша аҽны ишәзеиӷьаҳшьоит агәабзиара,​ агәалаҟазаара ҳаракы, арҿиаратә еихьӡарақәа, шәҭаацәеи шәареи шәеигымзарц!
Ҽаанбзиала шәгәырӷьо шәнеилааит!

Џьулетта Ианкәа-иԥҳа Адлеиба дравторуп 50 инареиҳаны афольклористикеи, абызшәа астилистикеи, апоетикеи уҳәа ирызку аҭҵаарадырратә усумҭақәеи аметодикатә хархәагақәеи, иара убасгьы ҩ-томкны иҭыжьу «Алакә астили апоетика-композициатә системеи» ҳәа хыс измоу амонографиеи.

Аспирантуреи адокторонтуреи дахысуан СССР Аҭҵаарадыррақәа ракадемиа А. М. Горки ихьӡ зху ​Адунеизегьтәи алитературатә институт аҟны, анаҩс ​ Урыстәылатәи Аҭҵаарадыррақәа Ракадемиа (РАН), «афольклористика» азанааҭ ала.​ Иҭылҵаауеит ажәлар рҿаԥыцтә​ традициақәа афольклористика аексперименталтә​ хырхарҭала (В.М. Гацак ишкол). Лнапы алакуп аканонтә текстқәа рыҭҵаареи реиҭагареи.

Еиуеиԥшым аамҭақәа рзы Џьулетта Ианкәа-иҧҳа рҵаҩыс аус луан Аԥснытәи аҳәынҭқарратә университет аҟны, К. С. Циолковски​ ихьӡ зху Урыстәылатәи аҳәынҭқарратә​ технологиатә университ аҟны, ​ ААУ аԥсуа литература акафедра деиҳабын,​ Ателехәаҧшреи арадиои Останкинтәи ринститут (Москва) азеиԥшгуманитартә кафедра напхгара алҭон.