Абҵара 24 рзы Аҧснытәи аҳәынҭқарратә университет аделегациа - афилологиатә факультет адекан, адоцент Хагәышь Б. А., В. П. Анқәаб ихьӡ зху Аҧсуа-адыга филологиа ацентр аиҳабы, арҵ. еиҳ. Анқәаб А. В., Ацентр алаборант еиҳабы Беиа А. З., аҧсуа бызшәеи алитературеи рзанааҭ IV акурс астудент Араҳамиа Д. Б. аҭааит Х. М. Бербеков ихьӡ зху Ҟабарда-Балкариатәи аҳәынҭқарратә университет, Асоциал-гуманитартә институт иаҵанакуа, А. М. Ципинов ихьӡ зху Адыга культура Ацентр. 

Аиҧылара хықәкыс иаман зыӡбахә ҳәоу ацентрқәа аҧхьаҟатәи русеицуразы аицәажәарақәа рымҩаҧгареи, уи шьақәзырӷәӷәо Аҧкаанҵа анапаҵаҩреи.

Гәахәарыла асасцәа ирҧылеит: Ацентр аиҳабы - Езаова М. Иу.; аҟабарда-черқьез бызшәеи алитературеи ркафедра аиҳабы Хутежев З. Г.; акафедра аусзуҩ, аҧсуа-адыга бызшәақәа рышьаҭа ҵаулақәа рыҭҵаареи, урҭ реимадареи рышьақәырӷәӷәара иазҿлымҳау, адоцент​ Карданов М. Л.

Аиҧылараҟны аҩганк аҳамҭақәа еимырдеит, имҩыҧысит аҧхарреи аизгәыбылра ҳараки аҵаны.