Аԥсуа ҵарауаа Зураб Џьапуа, Саида Ҳаџьым, Наала Барцыц рхы аладырхәит абҵарамза 20-21 рзы Ареспублика Саха (Иакутиа)
аҳҭнықалақь Иакутск имҩаԥысуаз «Аепос адунеитә енциклопедистика аконтекст аҿы» зыхьӡыз Жәларбжьаратәи аҭҵаарадырратә
конференциа.

Аусмҩаҧгатә рыдҳәалан аҭоурыхтә ҭҵаарадыррақәа рдоктор, апрофессор,
Аҩада-Мрагыларатәи Афедералтә университет аҭҵаарадырратә институт «Олонхо» актәи адиректор Уасил Иванов 90 шықәса ихыҵра,
аиакутцәа рфырхаҵаратә епос «олонхо» Адунеи ауаажәларра иматериалтәым рҭынха ашедеврқәа ирхырԥхьаӡалоижьҭеи 20
шықәса аҵра, иара убас Олонхо Аҭҵаарадырратә институт 15 шықәса
ахыҵра.

Аконференциа иалахәын Аԥсны, Монголиа, Ермантәыла, Ҟырӷызсҭан рҳәынҭқаррақәа рҵарауаа, иара убас Урыстәыла
атәылаҿацәқәа: Иакутиа, Буриатиа, Хакасиа, Алтаи, Калмыкиа, Ҟабарда-Балкариа, Башкартасҭан, Новосибирск, Москва рҵарауаа.

Аҭҵаарадырратә усмҩаԥгатә аартра рхы аладырхәит Ареспублика Саха (Иакутиа) анапхгарагьы.

Апленартә еилатәараҿы дықәгылеит Аԥсны аҭҵаарадыррақәа ракадемиа апрезидент, академик Зураб Џьапуа. Аилатәараҿы иӡырган
жәа-томкны иҟоу аԥсуа нарҭтә епос. З.Џь. Џьапуа иажәахә рызкын
аԥсуа фырхаҵаратә епос атомқәа аҭыжьра разырхиара иацыз атекстологиатә зҵаарақәа.

Ҩымш ицоз аҭҵаарадырратә конференциаҿы аԥсуа ҵарауаа иҟарҵаз ажәахәқәа рызкын абарҭ атемақәа: «Аҭаацәараҿы ажәабжьҳәаратә традициа: Маадан Сақаниа ифырхаҵаратә ҳәамҭақәа аҩбатәи рыԥсҭазаара» (С.О. Ҳаџьым), «Аԥсуа ҭоурыхтә епос афырхаҵа ихаҭара аазырԥшуа атрибутқәа» (Н.С. Барцыц).