Ажурнал «Алашара» 70 шықәса ахыҵит. Абри инамаданы ажурнал анапхгареи аредакциа аусзуҩцәеи рахь адныҳәалара ҟаиҵеит Аԥснытәи аҳәынҭқарратә университет аректор академик А. А. Гәарамиа.

Ҳаҭыр зқәу ажурнал «Алашара» аредактор хада Анатоли Лагәлаа! Акыр иаԥсоу аредакциа аусзуҩцәа!  

​Аԥснытәи аҳәынҭқарратә университет аректорати, апрофессорра-рҵаҩратә еилазаареи, астудентцәеи рыхьӡала, хаҭала саргьы гәык-ԥсыкала ишәыдысныҳәалоит ажурнал «Алашара» 70 шықәса ахыҵра.

Ииашаҵәҟьаны, ари ныҳәа дуӡӡоуп аԥсуа жәлар рдоуҳатә культуреи рлитературеи рзы еиԥш, иааидкыланы, ҳмилаҭ зегьы рзы.  
​Избан акәзар ажурнал «Алашара» аира, уи аҭыҵра аамҭа хьанҭақәа ирықәшәеит. Уаанӡатәи аполитикатә ҭагылазаашьа бааԥс иҵнашәаауан ҳдоуҳа амч, абаҩхатәра зманы ицәырҵуаз ҳашәҟәыҩҩцәеи ҳпоетцәеи харада-барада идырӡуан. Еиҳа-еиҳа иҭшәахон аԥсуа бызшәа аҳәаақәа, иадыркуан ҳашколқәа, ҳҩыра нбан усгьы ирыԥсаххьан. Аха «аԥсасира аамҭа» ҳәа ззырҳәоз анааи, аԥсгарҭақәа ҟало иалагеит. Убасҟан ҽаамҭанык еиԥшымкәа иаҭахын ажәлар рҿахәы аартны изҳәашаз литературатә ҭыжьымҭа ҿыцк. Уи ажурнал «Алашара» акәхеит.  

​Ажурнал ахьӡ ахаҭа ишьақәнарӷәӷәоит иара аҭыҵра ианалага, 1955 шықәса инаркны, ҳажәлар рдоуҳатә ԥсҭазаараҿы лашарак ацәаара шцәырҵыз. Уи ишьҭнахт ҳажәлар рдоуҳа, еиднакылт, рымҩагь аанартит абаҩхатәра змаз апоетцәа, ашәҟәыҩҩцәа, аҵарауаа. Ажурнал ианылон жанр рацәала алитературатә рҿиамҭақәа, иара убасгьы иҷыдоу аҭыԥ ааныркылон аԥсуа жәлар рҿаԥыцтә рҿиамҭақәа, аиҭагақәа уҳәа. Ус-ус, маҷ-маҷ аҭҵаарадырра знапы алаку аҿар реиҵааӡара, рымҩақәҵара традициас ишьҭнахит.  

​Абраҟа имҳәакәа узавсуам ажурнал «Алашара» ахацыркраҿы аԥсуа литература апатриарх, Аԥсны жәлар рпоет Дырмит Гәлиа иџьабаа, илагала. Уи ԥызара иуан, аԥхьагылара рзиуан усҟантәи аамҭазы иааиҵагылаз аԥсуа интеллигенциа, ашәҟәыҩҩцәа, аҵарауаа, ажурнал акәша-мыкәша зҽеидызкылаз абаҩхатәрауаа: Б. Шьынқәба, И. Папасқьыр, А. Џьонуа, Ш. Инал-иԥа, К. Ломиа, И. Ҭарба, М. Аҳашба уҳәа аӡәырҩы. Дыҟамзар ҟалап аԥсыуа поетк, шәҟәыҩҩык, ҵарауаҩык, ажурнал «Алашара» аредакциа иҩнымсыз. Иаҳҳәар ҟалоит, уи иааӡеит, иаӡрыжәит ҳәа абиԥарақәа жәпакы.  

​Иахьа ҳара ҳазыгәдууп ҳжурнал. Избан акәзар уи амаҵ азызуа, зҩымҭақәа анызҵо рахьтә аӡәырҩы ҳмилаҭтә университет иаушьҭымҭацәоуп. Убарҭқәа рнаҩсангьы даараӡа акраҵанакуеит ҿыц аҵарадыррахь зымҩа ылызхуа, алитературахь ашьаҿақәа ҟазҵо, аҭҵаарадырра иазҿлымҳау ҳастудентцәа ари ажурнал иахьадшәыԥхьало, икьыԥхьлартә еиԥш алшара ахьырзаԥышәҵо. Ҳара ҳазхиоуп ишьақәгылахьоу атрадициа бзиақәа ирыцҵауа, ажурнал «Алашара» ианыло ҳашәҟәыҩҩцәа рҩымҭақәа рыхцәажәара, реилыргара иазку аусмҩаԥгатәқәа ҳуниверситет аҟны аԥхьаҟагьы реиҿкаара.  

​Зегьы ишәзеиӷьасшьоит агәабзиара, арҿиаратә гәалаҟазаара, алшара дуқәа, хыԥхьаӡара рацәала аԥхьаҩцәа. Шәаԥхьаҟа ишәзыԥшызааит аихьӡара ҿыцқәа!