Иахьа ииубилеи азгәеиҭоит аҧсуа литература акафедра адоцент, Нарҭдырреи адәынтәи афольклорҭҵаареи рцентр аиҳабы ихаҭыҧуаҩ, Аҧсны жәлар Рџьынџьтәылатә еибашьра аветеран, Леон иорден занашьоу Адгәыр Паата-иҧа Какоба.

 

Аиубилиар дидныҳәалеит Аҧснытәи аҳәынҭқарратә университет аректор, академик А. А. Гәарамиа.

 

Акыр иаҧсоу Адгәыр Паата-иҧа!

 

Аҧснытәи аҳәынҭқарратә университет аректорати, апрофессорра-рҵаҩратә еилазаареи, астудентцәеи рыхьӡала, хаҭала саргьы гәык-ҧсыкала иудысныҳәалоит уиубилеи.

 

Аҧсуа изы 60 шықәса қәра дуум, абыржәоуп уӷәӷәамҭа уанынҭагыла. Арҭ ашықәсқәа ирылагӡаны уара уанысит имариамыз амҩа, имаҷым иулшаз, узыхьӡаз. Аҧсҭазаараҿы ууаҩы маншәалоуп: аҵарадырра аусқәа ирыдҳәаланы атәыла анҭыҵ, Урыстәылеи, Нхыҵ-Кавказ ҳаешьаратә жәларқәеи рахь акыр ҳаицныҟәахьеит.

 

Ламысцқьала уусуреи улшарақәеи ирыбзоураны еиуеиҧшым аҳаракырақәа рахь ухалон. Аус уухьеит еиуеиҧшым амаҵураҭыҧқәа рҟны: Аҧснытәи аҳәынҭқарратә университет аректор ицхырааҩыс, аҧсуа литература акафедра алаборантс, арҵаҩы еиҳабыс, Д. И. Гәлиа ихьӡ зху Аҧсуаҭҵааратә институт афольклортә лабораториа анапхгаҩыс, аҭҵаарадырратә усзуҩ еиҳабыс Нарҭдырреи адәынтәи афольклорҭҵаареи рцентр аиҳабы ихаҭыҧуаҩс, хәышықәса инархыҳәҳәо Аҧсны аҵарадырра аминистрс уҟан, иахьа аминистрра Аколлегиа уалоуп.

 

Аус ахьууазаалакгьы, уҧсҭазаараҿы, уара еснагь зус ҭакҧхықәрала иазнеиуаз, иахьагьы иазнеиуа, аиашара иазықәҧо уаҩҧсуп. Иҳанаҳәо акыр ирацәоуп, еиҵагыло абиҧарақәа рзы иҿырҧшыгоуп Аҧсны Аџьынџьтәылатә еибашьраан ухымҩаҧгашьа, уфырхаҵара: ушқәыҧшӡаз Аҧсадгьыл ахьчаразы абџьар унаҵагылеит. Иуанашьоуп Леон иорден.

 

Иахьа уара аҧсуа литература акафедра уадоцентуп, аколлектив аҟны ҳаҭыр зқәу, аҧышәагьы змоу рҵаҩуп, унапы алакуп афольклорҭҵаара.

 

Иузеиӷьасшьоит агәабзиара, агәалаҟазаара ҳаракы, аманшәалара, унапы злаку аусқәа рҟны ақәҿиарақәа, агәамч, алшара, агәызҩыдара, ухы-ухшара, уҭаацәа ҧшӡа рыгәҭаны!

Ҳаҭырла,

 

Аҧснытәи аҳәынҭқарратә университет

аректор, академик А. А. ГӘАРАМИА