Аҧснытәи аҳәынҭқарратә университет аҭоурыхтә факультет аҟны жәларбжьаратәи астудент имш азгәарҭеит. Уи рхы аладырхәит Аҧснытәи аҳәынҭқарратә университет аҿар рполитика азы апроректор Медеиа Чегьиа, аҭоурыхтә факультет анапхгара, апрофессорра-рҵаҩратә еилазаара, иара убас, астудентцәа.

Аиҧылара аартуа аҭоурыхтә факультет анапхгаҩы ихаҭыҧуаҩ Илона Агрба астудентцәа рныҳәа рыдныҳәало аҵарадырраҿы аартра ҿыцқәеи аманшәалареи рзеиӷьалшьеит.

"Еиҵагылоу аҿар шәнапы иануп ҳтәыла ҧхьаҟатәи аҧеиҧш, ҳмилаҭтә культура аиқәырхареи уи аихаҳареи шәхықәкы хадақәа ируакуп, убри инамаданы ақәҿиара дуқәа зцу аҵарадырра амҩа шәаныланы иреиҳау аҳаракырақәа шәрызнеиларц азы амчи-алшареи, арҿиаратә гәазыҳәареи шәзеиӷьасшьоит" – ҳәа азгәалҭеит лара лықәгылараҿы.

Аиҧылара аҳәаақәа ирҭагӡаны ҳазҭоу ашықәс азы аҭоурыхтә факультет ахь зшьаҿа еихызгаз актәи акурс астудентцәа астуденттә ҭоуба аура мҩаҧыргеит, уи инамаданы дара реиҳабацәа афакультет абираҟ рнапаҿы иддыркит.

Аусмҩаҧгатә иалагӡаны аҭоурыхтә факультет астудентцәа инарыгӡеит еиуеиҧшым акәашарақәа, иара убас, рырҵаҩцәа ирыдырҵо аџьабаа ахә шьо идуӡӡаны иҭабуп ҳәа рарҳәеит.