Аԥснытәи аҳәынҭқарратә университет аректор академик Алеко Гәарамиа еицырдыруа ауаажәларратәи аҳәынҭқарратәи усзуҩ, аҭоурыхҭҵааҩ, абызшәадырҩы, аполитик, Гь. А. Ӡиӡариа ихьӡ зху Аҳәынҭқарратә премиа алауреат, «Ахьӡ-Аԥша» аорден III, II, I аҩаӡарақәа занашьоу, Аԥсны аҭҵаарадырра зҽаԥсазтәыз аусзуҩ, афилологиатә ҭҵаарадыррақәа рдоктор, апрофессор, академик Валери Ермеи-иԥа Кәарҷиа ииубилеи идиныҳәалеит. 

Акыр иаԥсоу Валери Ермеи-иԥа!

Аԥснытәи аҳәынҭқарратә университет Аҵарауаа рхеилаки, аректорати, апрофессорра-рҵаҩратә еилазаареи, астудентцәеи рыхьӡала, хаҭала саргьы гәык-ԥсыкала иудысныҳәалоит иахьа гәырӷьарала узԥыло уиубилеи лаша. 80 шықәса аԥсуа изы қәра дуум, аха уи иҭаӡоит епоха дуӡӡак. Ари аамҭа иалагӡаны уара уанысит имариамыз, хҭыслагьы ибеиаз аԥсҭазааратә мҩа. 

Иазгәаҭатәуп, Аҟәатәи аҳәынҭқарратә арҵаҩратә ҵараиурҭа аҭоурыхтә факультет уалганы аԥсҭазаара ду ахь ушьаҿа анеихуга инаркны иахьа уажәраанӡа ҩ-ус хьанҭак еиҿыбаауа ишеидубало – уи аполитикеи аҭҵаарадырреи роуп. Авторс урымоуп Аԥсны аҭоурыхи, атопонимикеи; аԥсуа жәлар ретникатә хылҵшьҭреи; ақарҭвел антропонимиаҿы аԥсуа-абаза жәлақәеи абшьҭратә хьыӡқәеи; аԥсуа бызшәа азанааҭтә лексикеи уҳәа ирызку еицырдыруа, хәы змаӡам амонографиақәа, иара убасгьы 100 инареиҳаны егьырҭ аҭҵаарадырратә усумҭақәа. Аԥсны Аҳәынҭқарра раԥхьатәи ахсаалақәа аԥсышәалеи урысшәалеи еиқәзыршәаз авторцәа уруаӡәкуп. Аԥсны Жәлар Реизара – Апарламент ԥшь-ааԥхьарак рахь депутатс уалхын, Апарламент VI ааԥхьара еиҳабыс уҟан. Акыр аџьа убеит аԥсуа-аурыс ҳәынҭқарратә ҳәаа аделимитациеи адемаркациеи ирызкны аиҳабырабжьаратә Комиссиа аилазаараҿы.

Уареи сареи ҳхәыҷаахыс ҳаибадыруеит, еицҳазҳаит ашахтиортә қалақь Тҟәарчал. Анаҩс Жәлар  Реизара "Ахьтәы парламент" ҳәа изышьҭаз ааԥхьараҿы ҳдепутатцәан. 

Абарҭқәа рнаҩс иалкааны иҳәатәуп, Д. И. Гәлиа ихьӡ зху Аԥсуаҭҵааратә институт аҟны уусура уҽахаршәаланы, ҳмилаҭтә ҵараиурҭаҿы алекциақәа ушрыԥхьоз. Аҵыхәтәантәи аамҭақәа рзы акәзар, Аԥснытәи аҳәынҭқарратә университет апрофессор иаҳасабала Аҳәынҭқарратә ԥышәаратә комиссиақәа хантәаҩра рзууеит. 

Уара, еицырдыруа ауаажәларратәи аҳәынҭқарратәи усзуҩ, аҭоурыхҭҵааҩ, абызшәадырҩы, аполитик, Аԥсны азы иубахьоу аџьабааи улшамҭақәеи азгәарҭахьеит атәыла анапхгара. Гь. А. Ӡиӡариа ихьӡ зху Аҳәынҭқарратә премиа уалауреатуп, иуанашьоуп «Ахьӡ-Аԥша» аорден III, II, I аҩаӡарақәа, иухҵоуп Аԥсны аҭҵаарадырра зҽаԥсазтәыз аусзуҩ ҳәа ахьӡ ҳаракы.
Уиубилеи удныҳәалауа, иузеиӷьасшьоит агәабзиара, арҿиаратә гәаҳәара, аԥсуа иқәранҵыра ду, унапы злаку аусқәа рҿы аихьӡара ҿыцқәа, аҭаацәаратә маншәалара. Ҽаанбзиала угәырӷьо унеилааит! Шьардаамҭа!

Аректор А. А. ГӘАРАМИА
10.02.2026 ш.