16.02.2026 ш. Аԥснытәи аҳәынҭқарратә университет аректорат, апрофессорра-рҵаҩратә еилазаара, аусзуҩцәа, иара убас астудентцәа ауацәеи аҭынхацәеи рахь гәалсра дула адышшылара ҟарҵоит еицырдыруа аԥсуа поет, апрозаик, апублицист, ауаажәларратә усзуҩы, «Ахьӡ-Аԥша» аорден III аҩаӡара занашьаз, Д.И. Гәлиеи Т.Ш. Аџьбеи рыхьӡ зху Аҳәынҭқарратә премиақәа рлауреат, Аԥсны акультура зҽаԥсазтәыз аусзуҩы, ажурнал «Алашара» аредактор хада, ААУ аушьҭымҭа Анатоли Ианкәа-иԥа Лагәлаа иаамҭамкәа иԥсҭазаара дахьалҵыз инамаданы.

Анатоли Ианкәа-иԥа идунеи ахьиҧсахыз аԥсуа  культуразы ицәыӡ дуӡӡоуп. Ахатәы бызшәеи амилаҭтә литературеи ирзынархаз ганрацәалатәи иусура аҩаӡара ҳаракын. Абаҩхатәра ҟаимаҭи аиҿкааратә усқәеи еицнаго иара акыршықәса ажурнал «Алашара» аредакциа напхгара аиҭон. Уи инапхгарала ари аҭыжьымҭа аԥсуа шәҟәыҩҩра иреиӷьу атрадициақәа еиқәырханы, ажәа азҟазацәа дуқәа реиԥш, аҿаргьы рбаҩхатәра аадырԥшырц алшара рнаҭон. 

Анатоли Лагәлаа ҳаамҭазтәи амилаҭтә литература аҿиараҿы алагала ду ҟаиҵеит, иҩымҭақәа доуҳатә ҭынха дуны иаанижьит. Ҳара уи даадыруан аԥсуа бызшәа аҧсы ахьҭоу здыруаз, ҟазарала автортә программақәа арадиоеи ателехәаԥшреи рҟны имҩаԥызгоз, иара убасгьы апародиақәа шьахәла изцааиуаз,  ауаа рҟазшьа ҷыдақәа згәаҵанӡа изныруаз аӡәы иаҳасабала. 

Анатоли Ианкәа-иԥа ауниверситет алитература-рҿиаратә ԥсҭазаара активла ихы алаирхәуан. Аԥсуа литература акафедреи Ашәҟәыҩҩцәа реидгылеи еиҿыркаауаз аиԥыларақәа лассы-лассы дырҭаауан, алитература аганахьала астудентцәа рҵара-ааӡара аус азҿлымҳара азиуан. 

Ҳара ҳгәалашәараҿы Анатоли Ианкәа-иԥа даанхоит абаҩхатәра ду злаз, згәы аартыз, асахьаркыратә ажәа азҟаза ду иаҳасабала. Иҭаацәа, иуацәа, иҭынхацәа, иколлегацәа, иара ицәыӡра иацу ахьаа рыцеиҩаҳшоит. Игәалашәара лаша наунагӡа ҳгәаҵаҿы иаанхоит.