70 шықәса ихыҵит еицырдыруа асахьаҭыхҩы, аскульптор, Аԥсны акультура зҽаҧсазтәыз аусзуҩ, Аҧсны жәлар рсахьаҭыхҩы, Аԥснытәи аҳәынҭқарратә университет
аҟазарақәа рфакультет аиҳабы,
адоцент Нугзар Логуа. Аиубилиар дидныҳәалеит аҵараиурҭа аректор, академик Алеко Гәарамиа.

Акыр иаԥсоу Нугзар Ҷыҷыкәа-иԥа!
Ҳмилаҭтә университет Аҵарауаа рхеилаки, апрофессорра-рҵаҩратә еилазаареи, астудентцәеи рыхьӡала гәык-ԥсыкала иудысныҳәалоит 70 шықәса ухыҵра. 

Анцәа ду имҭаны, Уара ганрацәала абаҩхатәра злоу ҟазоуп, аха урҭ зегьы ирхадароу – инагоу сахьаҭыхҩуп. Урҿиамҭақәа еицырдыруеит ҳтәылаҿы еиԥш, анҭыҵгьы. Хаҭалатәи уцәыргақәҵақәа еиҿукаахьеит Аԥсни Урыстәылеи реиԥш, Италиагьы. Авторс урымоуп ҳажәлар рфырхаҵаратә ҭоурых наӡаӡазтәуа аскульптура-монументалтә рҿиамҭақәа.

Уара еснагь активла уалахәын, иахьагьы уалахәуп Аԥсны Аҳәынҭқарра ауаажәларра-политикатә ԥсҭазаара. Иныҟәугахьеит еиуеиԥшым аҳәынҭқарратә маҵурақәагьы. Ҳтәыла асахьаҭыхыҩцәа реидгыла напхгара ауҭон, уҟан Аԥсны акультура аминистрс. 

Иахьа ҳҵараиурҭа аҟазарақәа рфакультет уеиҳабуп. Акрааҵуеит араҟа аҿар реиҵааӡара унапы алакуижьҭеи. Аханатә инаркны ауниверситет аҿы аҟазара ахырхарҭа ашьақәгылареи арҿиареи рхыҵхырҭаҿы игылаз уруаӡәкуп. Ибжьамӡит уцнагаҩцәеи уареи шәџьабаа: афакультет аизҳара амҩа иануп, иаатуеит иҿыцу ахырхарҭақәеи азанааҭқәеи. 

Аԥсны акультура аусхк аизҳазыӷьареи аҟазара арҿиареи рганахьала ҳҳәынҭқарра анапхгара улшамҭақәа рыхә ҳаракны иршьахьеит. Иухҵоуп Аԥсны зҽаԥсазтәыз акультура аусзуҩ ҳәа ахьӡ ҳаракы, ааигәа атәыла Ахада иқәҵарала иуанашьан Аԥсны жәлар рсахьаҭыхҩы ҳәа аҳаҭыртә хьӡы.  

Уҟазара анаҩс иулоу аиҿкааратә ҟыбаҩ иабзоураны, ҳдоуҳатә культура арҿиара, уи аӡыргара иадҳәалоу акыр усхкқәа мҩаԥугахьеит. Урҭ рахьтә иалукаартә иҟоуп жәларбжьаратәи арт-пленерқәа, ацәыргақәҵақәа уҳәа. Агәра аагоит, аԥхьаҟагьы угәҭакқәа шмаҷым. Урҭ зегьы урыхьӡартә еиԥш агәабзиареи алшареи ҳазшаз иуаҭәеишьааит! 

Уиубилеи удныҳәалауа иузеӷьасшьоит ақәранҵыра ду, аманшәалареи аихьӡара ҿыцқәеи. Уҭаацәеи, ухшареи, урҭ рхылҵи рганахьала хьаа-баа умамкәа, узҭаху-иуҭаху угымкәа, еснагь арҿиаратә гәалаҟара уманы анцәа уҟаиҵааит. Уаԥсуара уагымзааит. Ҽаанбзиала угәырӷьо унеилааит!